529 पटक हेरिएको 
काठमाडौं असोज, २९ । नेपाली क्रिकेट टोलीका कप्तान पारस खड्काले पदबाट राजीनामा दिएको घोषणा गरेका छन् । नेपाली क्रिकेटले भर्खरै निर्वाचित बोर्ड पाएको र अन्तर्राष्ट्रिय क्रिकेट परिषदले नेपालकाे निलम्बन फुकुवाकाे प्रक्रिया अगाडी बढाएकाे दाेस्राे दिन नै कप्तान पारसले कप्तानी छाेडेकाे बताएका छन । नेपाली क्रिकेटका सफल कप्तान पारसकाे याे निर्णयले क्रिकेट जगत नै चकित परेकाे छ ।
हिजो आफ्नो ट्वीटरबाट उनले राजीनामा गरेको घोषणा गरेका हुन् । नेपाली क्रिकेटको निलम्बन फुकुवा भएकोमा खुशी व्यक्त गर्दै नेपाली क्रिकेट, खेलाडी र यसका अरु पक्षमा राम्रो गर्न उनले नवनिर्वाचित कमिटीलाई शुभकामना पनि दिएका छन् ।
त्यसै ट्वीटमा उनले थप लेखेका छन्, ‘मैले नेपाली क्रिकेट टीमको कप्तानबाट राजीनामा दिने निर्णय गरेको छु । जय नेपाल !’
सन् २००९ देखी राष्ट्रिय टोलीको कप्तानी सम्हालेका पारस विनोद दासपछि नेपाली टिमकाे नेतृत्व गर्दे अाएका थिए । उनले पहिलाेपटक एसीसी टी-२० एलिट कपमा मलेसियाविरुद्ध पहिलो खेल कप्तानी गरेका थिए । पारसको कप्तानीमा नेपालले डिभिजन ५ देखी ३ सम्मको उपाधि जितेको छ । त्यस्तै पारसले सन् २०१४ मा नेपाललाई पहिलो पटक टि ट्वान्टी विश्वकप खेलाएका थिए ।
पारसले आफ्नो कप्तानीमा नेपाललाई वान डे मान्यता, पहिलो वान डे सिरिज र टि ट्वान्टी सिरिज जिताएका थिए । पारस नेपालबाट वान डे र टि ट्वान्टी दुबैमा शतक प्रहार गर्ने एक्लो र पहिलो खेलाडी समेत हुन् ।
२००४ मा सिनियर टिमबाट डेब्यू गरेका उनले २००९ मा राष्ट्रिय टिमको कप्तानी सम्हालेका थिए । उनको कप्तानीमा नेपालले २०१३ मा टी-ट्वान्टी विश्वकप २०१४ मा खेल्यो भने २०१८ मा एकदिवसीय मान्यता पायो । कप्तान पद छाडेपनि पारसले अझै केही समय राष्ट्रिय टिमबाट भने खेल्नेछन् ।
