338 पटक हेरिएको जापान, बैशाख ९ ।
जापानमा नेपाल हाउस निर्माणार्थ सहयोग जुटाउने उदेश्यले आयोजित १४ औं नेपाल फेस्टिवल टोक्यो २०२४ मा ८३ लाख बढि मुनाफा भएको छ । “नेपाल र नेपालीको जापानमा पहिचान, १४ औं नेपाल फेस्टिवलखमार्फत नेपालमा पर्यटन प्रवद्र्धन ।“ भन्ने मूल मान्यताका साथ जापानका लागि नेपाली दुतावास टोकियो जापान, गैर आवासीय नेपाली संघ राष्ट्रिय समन्वय परिषद् जापान र नेपाल आदिवासी जनजाति महासंघ जापानको संयुक्त आयोजनामा गत नोभेम्बर ३० र डिसेम्बर १ तारिखका दिन भब्य रुपमा सम्पन्न नेपाल फेस्टिवलको आईतबार टोकियोमा एक औपचारिक कार्यक्रम आयोजना गर्दै आय व्यय सार्वजनिक गरी उक्त जानकारी गराइएको हो ।
एनआरएनए जापानको नेतृत्वमा निर्माण गरिन लागेको नेपाल हाउस निर्माणार्थ सहयोग जुटाउनुका साथै नेपालीको जापानमा पहिचान, नेपालको पर्यटन प्रवद्र्धन गर्ने, नेपालको कला संस्कृति रीतिरिवाज परम्परालाई प्रवासमा निरन्तरता दिने ध्येयका साथ आयोजित नेपाल फेस्टिवलमा कुल आम्दानी २ करोड ३४ लाख ६ हजार १ सय ११ जापानी येन भएको र कुल खर्च १ करोड ५० लाख २३ हजार ३०० हुँदा कुल बचत ८३ लाख ८२ हजार ८११ भएको १४ औं नेपाल फेस्टिवल २०२४ का आर्थिक व्यवस्थापन संयोजक तथा एनआरएनए जापानका उपाध्यक्ष कृष्ण गैरेले उक्त कार्यक्रममा जानकारी गराएका हुन् ।
फेस्टिवलमा राखिएका रेष्टुरेन्टका स्टलबाट ४८ लाख, सेवामुलक स्टलबाट ३६ लाख १० हजार र सहयोगीदाताहरुबाट १ करोड ४९ लाख ९६ हजार १११ आम्दानी भएको जानकारी गराउँदै आर्थिक व्यवस्थापन संयोजक गैरेले उक्त रकम मध्ये ४२ लाख १० हजार रकम उठ्न बाँकी रहेको बताए ।
फेस्टिवलको आय व्यय सार्वजनिक गर्दै संयोजक गैरेले बोलकबोल रकम मध्य उठ्न बाँकी रहेका सहयोगदातालाई आगामी हप्तासम्म रकम जम्मा गर्न अनुरोध गरिएको सो अवधिसम्ममा रकम जम्मा नभएमा बोलकबोल रकम मध्य जम्मा भएको रकम र जम्मा नगरेको रकम भनेर अधिकारी फेसबुक पेज मार्फत सार्वजनिक गरिने बताए ।
आयव्यय सार्वजनिक कार्यक्रममा बोल्दै जापानका लागि नेपाली राजदूत डा दुर्गाबहादुर सुवेदीले सफलतापूर्वक र सार्थकतापूर्वक नेपाल फेस्टिवल सम्पन्न गरिएकोमा खुशी व्यक्त गर्दै १४ औं नेपाल फेस्टिवलले राखेको उद्देश्य पूरा गर्नका लागि तदारुकताका साथ लाग्न आग्रह गरे। साथै आफूले समेत नेपाल हाउस निर्माणका लागि हरेक कोणबाट सहयोग गर्ने प्रतिवद्धता व्यत गरे । उक्त कार्यक्रममा बोल्दै राजदुत सुबेदीले बिगतका दिनमा आयोजक समिति तथा संस्थाहरुले उल्लेख्य सफलता हात नपारेको समयमा यस फेष्टिबलमा पनि त्यति सन्तोषजनक नहुने आकलन गरेकोमा यस पटकको फेष्टिबल आयोजक समिति र सक्रिय साथीहरुबाट मेरो सोचाईलाई उल्टाईदिएको मा खुशी लागेको बताएका थिए ।
कार्यक्रममा बोल्दै एनआरएनए आइसिसीका उपाध्यक्ष रोबिन शेरचनले जापानवासी सम्पूर्ण नेपालीको साथ र सहयोगमा नेपाल फेस्टिवल भव्यतापूर्वक सम्पन्न भएकोमा खुशी व्यक्त गर्दै अझ नाफामा जानु सकारात्मक भएको बताए । नेपाल फेस्टिवल आयोजक संस्था नेपाल आदिवासी जनजाति महासंघ जापानका अध्यक्ष हवलचन्द्र लामाले जापानमा नेपाल फेस्टिवल आयोजना गर्न टोकियोबाट सुरुवात भएको महासंघसंगको सहकार्य क्षेत्र क्षेत्रमा अझ झाँगिदै गरेकोमा सहकार्य सार्थकता पाएको बताउँदै सम्पन्न फेस्टिवलले आफ्नो उद्देश्य परिपूर्ति गर्न सकेको आफूलाई महसुस भएको बताए ।
कार्यक्रममा एनआरएनए एसिया प्यासिफिक क्षेत्रका उप संयोजक तथा विहुकोट समाज जापानका अध्यक्ष दिपक कँडेल, महिला सयोजक अनिता गुरुङ, एनआरएनए जापानका प्रमुख संरक्षक शिव प्रसाद पौडेल, संरक्षक देविलाल भण्डारी, सल्लाहकार बाबुराम भण्डारी, विशेषज्ञ समिति सदस्य सालिकराम भण्डारी बलराम उपाध्याय लगायतले नेपाल फेस्टिवल भव्य रूपमा सम्पन्न भएको बताएका थिए ।
कार्यक्रम एनआरएनए जापानका अध्यक्ष नविन निउरेको अध्यक्षता महासचिव टिकाराम खरेलको सञ्चालन र उपाध्यक्ष सचिन श्रेष्ठको स्वागत मन्तव्यमा सम्पन्न भएको थियो । २०२४ नोभेम्बर ३० र डिसेम्बर १ तारिखका दिन जापानको राजधानी टोकियोको नाकानो सिकिनोमोरी पार्कमा १४ औं नेपाल फेस्टिवल–२०२४ सम्पन्न भएको थियो ।
