1155 पटक हेरिएको 
काठमाण्डौ, माघ २७ ।
त्रिभुवन अन्तर्राष्ट्रिय विमानस्थलको एक पसलमा आगलागी भएको छ । अन्तर्राष्ट्रिय टर्मिनलको प्रस्थानतर्फको प्रतीक्षा कक्षको कफी सपमा आगलागी भएको हो । काठमाडौं प्रहरी परिसर, टेकुका डीएसपी होविन्द्र बोगटीले दमकलको सहायतामा आगलागी नियन्त्रणमा लिएको बताए । प्रारम्भिक अनुसन्धानमा विद्युत् सर्ट भएर आगलागी भएको हुनसक्ने देखिएको बताइएको छ ।
आगलागीपछि विमानस्थलको उडान अवतरण अबरुद्ध भएको थियो । अन्तार्राष्ट्रिय विमानस्थलको टर्मिनल भवनभित्रैको कफिसपमा आगो सल्किएपछि विमानस्थल नै बन्द गर्नुपर्यो । एक्कासी आगो फैलिन सुरु गरेपछि करिब २ घण्टाभन्दा बढी उडान अवतरण नै बन्द गर्नुपरेको थियो । राती १० बजेबाट विमानस्थलमा पुनः सेवा सुरू भएको छ । पहिलोपटक कतार एयरलाइन्सको जहाज दोहा उड्यो भने दिल्लीबाट आएको नेपाल एयरलाइन्सले अवतरण गरेको छ।
राति साढे आठ बजेको समयमा विमानस्थलको कफी शपमा लागेको आगो चार वटा दमकलको सहयोगमा झण्डै एक घण्टापछि नियन्त्रणमा लिइएको विमानस्थलले जानकारी दिएको छ ।आगलागी लगत्तै प्रभावित भएको उडान फेरि सामान्य अवस्थामा फर्किएको छ । आगलागीबाट कुनै मानवीय क्षति भने भएको छैन ।
