आस्था राउतको बिषयमा अनुसन्धान गर्न प्रहरी प्रधान कार्यालयको निर्देशन

  भिजन अनलाईन न्युज संवाददाता प्रकाशित:  1208 पटक हेरिएको

काठमाडौं, माघ २ ।

गायिका आस्था राउत सामाजिक सञ्जाल फेसबूकमा लाइभ गर्दै प्रहरीमाथि खनिएपछि विवादमा तानिएकी छिन् । राउतले आफ्नो फेसबूक पेजमार्फत त्रिभुवन अन्तराष्ट्रिय विमानस्थलमा महिला प्रहरीले अपमानजनक व्यवहार गरेको आरोप लगाउँदै प्रहरीलाई तल्लोस्तरको गाली गरेकी थिइन् । राउतले लाइभ भिडियोमा प्रहरीलाई डन्ठे, प्यूसा, पुलिस हो कि फुलिस लगायतका शब्द प्रयोग गर्दै गाली गरेकी थिईन । उक्त भिडियो सामाजिक सञ्जालमा भाइरल बनेपछि प्रही हेडक्वार्टले यु बिषयमा के भएको हो छानबिन गर्न आदेश दिएको छ ।

सामाजिक सञ्जालमा भाइरल भएपछि आस्थाले उक्त भिडियो हटाइसकेकी छिन् । साथै उनले माफी माग्दै अर्को स्टाटस लेखेकी छिन् । तर, उनले प्रहरीले पनि व्यवहार सुधार गर्नुपर्ने बताएकी छिन् । ‘रिसको आवेगमा वेद पढिँदैन, मलाई पनि त्यस्तै भयो, केही शब्दहरुका लागि क्षमा चाहन्छु,’ आस्था राउतले पछिल्लो समय सामाजिक सञ्जालमा लेखेकी छिन्, ‘प्रशासनको कामहरुप्रति मलाई सधै सम्मान छ, तर सर्वसाधारणहरुसँग बोल्दा तुच्छ व्यवहार नगरियोस्, तँ तँ र म म गर्न बन्द गरियोस्, नैतिक शिक्षाको कमी नरहोस् ।’

भिडियोमा प्रहरीलाई तथानाम गाली गरेपछि सामाजिक सञ्जालमा यस बारेमा बहस भएको छ । धेरैले राउतको समर्थन र प्रहरीलाई गतिलो जवाफ दिएको प्रतिक्रिया दिएका छन् । यद्यपि आस्थाले प्रयोग गरेका शब्दप्रति पनि उनका फ्यान पनि असहमत देखिएका छन् ।

यसैबीच नेपाल प्रहरीका केन्द्रीय प्रवक्ता प्रहरी नायव महानिरीक्षक ९डीआईजी० शैलेश थापा क्षेत्रीले आस्था राउतले प्रहरी कर्मचारीविरुद्ध अपशब्द प्रयोग गर्दैै सामाजिक सञ्जालमा भिडियो ‘पोस्ट’ गरेको विषयमा छानबिन गर्न निर्देशन दिइएको बताए । ‘यो भिडियोको सन्दर्भमा प्रहरी प्रधान कार्यालयको ध्यानाकर्षण भएको छ । हामीले भिडियोको विषयलाई लिएर अनुसन्धान गर्न भनेर महानगरीय प्रहरीको कार्यालयलाई पत्राचार पनि गरिसकेका छौं,’ डिआईजी क्षेत्रीले भने ।

आस्था राउतले विमानस्थलमा सुरक्षा जाँचका क्रममा आफूमाथि प्रहरी कर्मचारीबाट ‘तल्लोस्तरको व्यवहार’ गरिएको भन्दै सामाजिक सञ्जालमा भिडियो पोस्ट गरेकी थिइन् । त्रिभुवन अन्तर्राष्ट्रिय विमानस्थलस्थित नेपाल प्रहरीको सुरक्षा कार्यालयका प्रहरीले दुव्र्यवहार गरेको राउतको आरोप छ । प्रहरीको विमानस्थल सुरक्षा कार्यालय महानगरीय प्रहरीअन्तर्गत पर्छ ।

तपाईको प्रतिक्रिया

सम्बन्धित समाचार